Angliýanyň "Premýer” ligasynda ýeňilmezek "Mançester Siti” myhmançylykda "Kuins Park Reýnjersi” Jeko (43), Silwa (52) we Ýaýa Tureniň (74) gollary bilen 3-2 hasabynda ýeňiş gazandy. Toparyň şäherdeşi "Ýunaýted” bolsa öz meýdançasynda "Sanderlandy” kabul etdi. Duşuşygyň ýeke-täk goluny 45-nji minutda "Ýunaýtediň” öňki oýunçysy Wes Brown öz toruna goýberdi. Şeýlelikde, "Ýunaýtedde” işläp başlanyna 25 ýyl dolan Ser Aleks Ferguson üçin öňki futbolçysyndan uly sowgat boldy. Şeýle netije "Blekbern” bilen "Çelsiniň” arasynda-da hasaba alnyp, şol goly-da Lampard derwezä gönükdirdi. "Arsenal” öz meýdançasynda "West Bromwiçiň” toruna jogapsyz 3 pökgi (Wan Persi, Wermalen, Arteta) girizip, 3 oçkony gazandy. Ligadaky başga ýeňlişsiz topar "Nýukasl” "Ewertondan” 2-1 hasabynda üstün çykdy. Ýeri gelende aýtsak, indiki tapgyrda "Mançester Siti” öz meýdançasynda "Nýukasly” kabul eder.
Ispaniýanyň "La Ligasynda” sanawyň lideri "Real Madrid” "Osasunany” 7-1 hasabynda ýeňlişe sezewar etdi. Madridlileriň doly artykmaçlygy bilen geçen oýunda ýer eýelerinden K. Ronaldo (23, 54 p, 58), Benzema (63, 81), Pepe (34) we Higuian (40) tapawutlandy. "Barselona” myhmançylykda Bilbaonyň "Atletigi” bilen 2-2 hasabynda deňme-deň oýnap, 2 oçkony ýitirdi. Ýagyşly geçen oýnuň 90+2-nji minutynda goragçylaryň ýalňyşlygyndan peýdalanan Lionel Messi hasaby deňläp, toparyny ýeňlişden halas etdi. "Walensiýa” bolsa liganyň sýurpriz topary, şäherdeşi "Lewanteni” 2-0 (Hawi Wenta 31 ö.d, Tino Kosta 50) hasabynda ýeňdi.