Ýol kes

Esasy sahypa » » Atakopek Mergen - Ilden owrendim

18:39

Atakopek Mergen - Ilden owrendim

Däli derýa ýaly dolup-daşmagy
Dagdan güwläp gaýdan silden öwrendim.
Kötel gaýalardan, dagdan aşmagy
Azaply, hupbatly ýoldan öwrendim.

Käte gamgyn boldum, käte hoş boldum,
Käteler gar booldum, kä ýagyş boldum,
Käte bahar boldum, käte gyş boldum,
Ony dört pasyldan-ýyldan öwrendim.

Şahyr işi goşgy-gazal bolmaly,
Goşgular goşgudan gözel bolmaly.
Bu gözel durmuşa bezeg bolmagy
Owadan al-elwan gülden öwrendim.

Watan, seniň ýigitleriň gaýratly,
Yeňlişleriň ägirt, gadamyň batly.
Seni taryplasam, sözlerim datly,
Süýji sözlemegi baldan öwrendim.

Ýowuz kynçylyga garşy durmagy,
Ýör diýilse, ilki gadam urmagy,
Beýik-beýik desgalary gurmagy
Işläp, zähmetsöýer elden öwrendim.

Özüm goja, göwnüm ýigit çagymda,
Ýokdur ýüregimde derdi-dagym-da.
Watan, seniň hoş sapaly bagyňda
Saýramagy şat bilbilden öwrendim.

Gujurum köp, dag-daşlary owratdym,
Azaşany dogry ýola ugratdym.
Bir zat bilsem, ony ile öwretdim,
Çünki ozal menem ilden öwrendim!